عــــرس بالتفصيل الممل ..

دعونا أعزائي نستعرض لكم حفل زواج ولكن بالقسم النسائي

لانه الاكثر اثاره طبعا وايضا لان وش دراني عن الرجاجيل <<خربت ام الاسلوب

طبعا الموضوع ودنا نخلي الاعضاء يعرفون ليه الحريم يحبون العروس ولكن بالنسبه للعضوات الكريمات << وش جاني صار أسلوبي كشخه هع

كل وحده تعرف بالنسبه لنفسها انا ماراح افضح واجلس اقول فيه ناس يحبون العروس لانه كذا وكذا لا بوصف اللى اشوفه

]

نبدا من بوابه القاعه عند الدخول الى باب السياره عند الخروج مره ثانيه

<< لحسة مووووووخ من البدايه


ماعلينا من الاستعدادات اللى قبل انا متنازله عنها اللى تبي تحطه وحده منكم بموضوع تحطه لا تسحتي تقول قلدت بنوته مالي شخصيه <<الله واكبر على صح ماخذه مقلب انا ووجهي هع

في بوابة القاعه طبعا اهل العرس كشخه ونادر الحين الدخول دون بطاقه خلاص راح زمان القطه وحركات المغاتير بدت تنقرض

اول شيء ياخذ البواب منك البطاقه وبعدها تتفضلين <<اكيد وين تروحين اجل

طبعا انتي متكشخه وتحسين باذله مجهود بعميرتك والله يعافي ذي اللى اعرست ذكرتك بعمرك تهتمين شوي

أول شي لازم التفتيش على الجولات

تقولون مهربين مخدرات معنا المشكله عاد ما نيب مصوره هالخشش الشينه وش ابي فيها

كلها بسبب ضعاف النفوس حسبي الله عليهم .. اللي يصورون كل من هب ودب

حتى الذبانه ماسلمت منهم

لازم نغير نجيب جوال عادي بدون كاميره تقولين ارهاب وش ذا الحكي


المهم إذا خلصت الجمارك من التفتيش قصدي اذا خلصوا من التفتيش على الجوالات بمكان الاستقبال بالقاعه

تعالوا شوفوا رزرزت الحريم عند المرايات اللي عند الاستقبال أو بدورات المياه

تبي تشوف نفسها وش احتاس في شعرها ووجهها وتتاكد مافي ثقه لحول


بعدها تدخل وتسلم ولو تلاحظون ماتبي احد يكثر سلام بالخد عشان مايروح المكياج <<إيه تراه بفلوس

ولما تخلص سلام تروح تنطق على احد الطاولات اللى عليها زي العاده حلى وفطاير وبسكوت وقهوه وشاهي ونعناع وبيالات وفناجيل << يعني بالله مافيها بيالات وفناجيل

وتبدا الاكل كنها تقولون متوصيه على الطاوله لازم تشطب عليها وتحاول تكون منتصه عشان تقدر تغطي الرؤية لكل اللي في القاعة <<بالمختصر تقز


والحين عاد تبدى مرحلة الطقطقه وهنا اقدر اقول تبدى المسرحيه التى تحمل الكثير من النكت والتريقيه والتطنز

وكل وحده تقول انا أنعم رقص من ذي لين اخر شي نكتشف انهم بس يمشون فقط

واللى تمشي ارحم من الى تطامر ياودي اقوم واجلدها اللى تطامر

مانيب متعمقه بالوصف لاني لو بحكي الى يوم الاثنين مانيب مخلصه بس جبت اشهر الحالات << احس كني اشرح جفرافيا مادري ليه


وممكن اثناء مرحلة الطقطقه الطقاقه يمكن تجيها ام العبيد وتحوم كبدها

مثلا مرهـ بزواج كانت الطقاقه تصارخ بالمايك جيبوا لي مويه ولما تشوف المنصه امتلت توقف طق وتقول زحمه لحد يرقص كثير

وتقول ارفعوا يدينكم وارقصوا بالدور وينا فيه جالسه تتحكمين فينا وجايبينك بفلوس

ولانها ايضا طقاقه ويدها ماخذه على الطق محد يتنفس ولا يتجرأ يهاوش الا اللى ودها ترجع بدون اسنان ولا عين كيفها عاد

ومرهـ سمعت ان فيه طقاقه ... كانت جايبه جوالها الكاميرا .. وخذوه منها قامت

وقالت مانيب طاقه لكم بالعرس بطلع منه << شف اللعانه << رجعوه لها خافوا منها تخرب العرس

نعنبوها قويه ... قويه


ومازلنا في مرحلة الطقطقه بس الحين راح تنزف العروس طبعا الحين تبدى وسوسة الحريم من الكاميرات تشوفون انواع القلق عندهم اللى تركض تبي طرحتها وعبايتها واللى تلاحق بناتها خايفه عليهم

والا اللي تاخذ طرف المفرش حق الطاوله وتتغطى فيه << يلعن أم الحاله

واللى ورى الكرسي جلست من الوسوسه واللى طلعت برى ..يعني الخوف بحدود ماختلفنا

بعدين الى تصور ترى تصور العروس ماتبي تطلع وجهك الزين من بين خلق الله عشان تبلشينا والقاعه مطفين الانوار لكن الاحتياط واجب لكن بدون زحمه بليز وبدون قلق

المهم القاعه مطفين الانوار وحاطين نور على العروسه << قولي قصم

لا بس للتوضيح اكثر خابره تماسيحنا مايفهمون << بتنجلد

والحين بتنزف العروس

بتلاحظون ان صوت المسجل داخل بضلوعكم من شدة ماالصوت عالي

كل عرس تنزف فيه العروس ارجع للبيت صقهى ليه يزيدون عليه كذا والمكبرات اللى تغرف القلب والمشكله تطول الزفه

وفيها تأثيرات دوم وخبط ولبط <<خلاص متى توصل بس تكفون


الحين العروسه وصلت للكوشه وتجلس وبالمقابل القاعه..

الكل يشوف إن له الحق انه يسلم ويالله هات زحمه سلام لين يروح مكياج العروس زافينها بيضاء ترجع سودا

وبعدها يرقصون شوي عندها العالم وبعدين تضف وجها << كني خربتها


والحين جت المرحله اللى نقدر نطلق عليها مرحلة الوحده تنسى إنها بعرس وحولها العالم


"فــجــــــــأه راح البــرسـتيــج"

طبعا وش بقى غير الـعشــــاء بهذي المرحله تقولون الناس مجوعين ثلاث ايام

ولا تقولون السعوديه عيشتهم خبز وجبن ولا عمرهم شافوا اكل زين

ماراح اوصف حالات الناس لكن باقول لكم موقف صار لي

عزمتني صديقتي على عرس وكان العرس حلو وماعليهم مرتبين وبرستيج بس يوم جا العشاء

وش اقول بس وش اوصف انا ماكنت ابي اتعشى لاني تاخرت وابي اطلع بس حلفت علي صديقتي قلت طيب عشانك وصلتني عند باب البوفيه ونادتها اختها وراحت

ودخلت الباب ياناس وش هذا تذكرت مقصفنا بالابتدائي وزحمته بس في فرق بالابتدائي وش ملحنا صغار

لكن الحين كل الدنيا كعوب وهات تدعيس انا خلاص بغيت اقول امي تبيني ترى خلاص مابي ادخل والناس تتقدم وانا ارجع خلاص قفلت معي لين قدرت اطلع وانتظرت الزحمه تروح <<مصدقه إنها بتروح


وطبعاً ماخفت الزحمه بس تقولون اسم خفـّت وادخل الا عمليات التشطيب على الصحون شبة اكتملت واخذ لي صحن وادور على البوفيه كل شي فاضي

مابقى الا المقبلات اخذت لي ملعقة حمص وتبوله بس وش انقهرت منه

ان فيه وحده كانت وراي وكل شوي تقولي عجلي امشي عجلي امشي شكلها كلت وخلصت وذا الرد الثاني

على ايش تزاحمني ومستعجله وانا اشوف الدنيا فاضيه

وبعدين تقولي يالله استعجلي امشي انا قفلت معي قلت يالله انا بروح عندك الصحون لحسيها

ورحت لجهة الحلا بغيت اصيح ياهو حوسه ومطرسه وكل شي داخل على بعض اخذت لي قطعة بسبوسه ومشيت

ادور لي مكان جلست مع ناس ويا انهم قهروني يضحكون على صحني من زيني معصقله ومسويه رجيم انا والصحن اللى معي

.. يالله الخيره تقولون في الصومال

مجاعه ما قد شافوا خير الله لا يبلانا بس ...

ومرهـ اتذكر اني دخلت بالوسط بين حريم حرّمت عقبها الا اصير اخر وحده

قاموا وطّوا فستاني لين راح وطي..

ووخرت منهم وخليتهم وطسيت انا وخشتي وقعدت عالكراسي

مالقيت الا بيبسي الله يكرم النعمه << معليش بس مااحبه

وماغير ابلع من هالببسي لين طلع مع اذني ..

ولا من زود الشفاحه يملون الصحون لين يطلع كنه جبل من كثر مافيه ...

واذا طلع جبل ياليته ينوكل ما ينوكل الله لا يعاقبنا ويقعدون ثلاثة ارباع المعازيم يدورون شي ياكلونه

وذولي المشفح مالين صحونهم ومخلينها جعله مر << حاقده بقوه



وبعدها كرهت شي اسمه اتعشى صرت اروح للعرس اطلع قبل اتعشى يمدحون الاندومي بالبيت ياناس


فالخلاصه من الموضوع هي:

*/ماسبب تدافع الحريم بالبوفيه ؟

*/لماذا الوحده تخرب برستيجها وكشختها عشان اكل ؟

*/هل الحريم مجوعين بالبيت ولا ماعمرهم شافوا مثل هاالاكل ؟

*/هل زوجها ولا ابوها ولا اخوانها يدرون عن تصرفاتها وانها مفشلتهم يعني اذا رجعت تقولهم اني سويت كذا

ولا تقول والله اليوم ماتعشيت وتستر على عمرها ؟




قبل أضف خشتي برايفت للجميع ترى الحريم مو كلهم كذا بس انا اتكلم عن مجموعه من الناس لحد يقاطعني ويحقد علي من البنات


يالله أشوف بالدور واحد واحد ردوا واللي تببي تحكي لي عن موقف مر عليها باأحد العروس تطربنا هع

والشباب وشي المواقف اللي تمر عليكم بالعروس



ماطووووووووووووووووووووووووووش

uJJJJvs fhgjtwdg hgllg >>

مابقى الا المقبلات اخذت لي ملعقة حمص وتبوله بس وش انقهرت منه

ان فيه وحده كانت وراي وكل شوي تقولي عجلي امشي عجلي امشي شكلها كلت وخلصت
وذا الرد الثاني ههههههههههههههه

والله كــــلامك صـــــح قد شفــــت بعيني هاذي الحوس قبل .......

والمقلب الي مـــ ــر عليه معـــزوم على عــ ــرس وبــعد ماسلمت على المعرس جــلست وجاني القهوجي
بيعطـــني القــهوه >>> شوفي وش صـــار كب القهوه على الثوب >>> وشوفي أنواع الأحراج
حـــرمت أشرب قهوه بعد الي صار

يسلموووووووو شمووووووووخه على العرس الجميـــيل ولي يحــمل عجــائب الحريم

تقبلي مروري
هــ ـلا لــي مــ ـ وت

ههههههههههههههههههههههههههههه

والله كــــلامك صـــــح قد شفــــت بعيني هاذي الحوس قبل ... >>> هههههه اعترف وين حضرت المغاتير ومنعوها ...

كب القهوه على الثوب >>> وشوفي أنواع الأحراج حـــرمت أشرب قهوه بعد الي صار >> هههههه يحرام من جد كل شي الا البرستيج يخرب ..


يسلمو هلالي ع مرورك الرااائع كروعتك ....

هههههههههههههههههههههههههههههههههههههههه

الله يعطيك العافيه ياشموووخ على الموضوع الرائع

تقبلي مروري وتحياتي

انا زائره والصور ماطلعت

صحيح كل اللي قلتيه .... شكرا على الموضوع الرائع
تقبلي مروري يالغلاا

ههههههههههههههههههه اما مقصف الابتدائي <<<< تشبيه بليغ والاداة محذوفه هع هع هع
الله يعطيكي العافيه

الله يعطيك العافيه ياشموووخ على الموضوع الرائع

تقبلي مروري وتحياتي

والله معك اشوف خواتي كل مارحت اجيبهم من عرس لازم نوقف عند مطعم اثاري الدعوة حرب ماهي عشاء

هههههههههههههههههههههههههههههههههههه

بالتفصيييييييل الكامل ..

يسلمووو وبانتظار جديدكـ

يرفع ..